2011年3月22日 星期二

短聚蘇杭

與友人相約結伴晚餐, 四人同遊, 留戀杭州風味.
醉乳鴿
酒香淡而清澈, 肉質也嫩, 但少一點鴿香, 可能同依家用雪藏鴿有關. 肉質鮮嫩, 有咬口, 不是梅林林的, 無咩骨所以口中的障礙很少.
東坡肉
蘇杭菜與上海菜相似, 除冷盤外, 一般菜式比較油膩而濃味. 這家店已經地道化左一部分. 用夾餅配以東坡肉可以減低油膩的口感, 但對我而言, 唔夾餅仲好食呀! 但可能因為要夾餅的關係, 師傅響個汁的調教偏向鹹少少. 但肥肉鬆化非常, 肥膏的香味滲進口中每個角落, 下面的瘦肉亦很林, 與肥膏混合, 有一種粘粘的感覺.
臭豆腐
脆口軟身, 係唔錯的選擇. 可能由細響街邊食大, 所以我都係嫌佢唔夠臭. 不過依家都好少會有好臭的臭豆腐啦, 所以都係覺得依家d小朋友無以前咁幸福.
這個唔記得左叫咩名, 基本上佢用個玻璃茨煮左個蝦仁, 雲腿, 同埋一d貌似竹笙, 口感似魚腐的東西. 清淡但不出其油膩的本色.
煙熏黃魚
真係好好食! 條魚未黎到已經嗅到煙熏香味, 有一種烤木的感覺. 從表面上見到條魚係充滿黃油的, 可見魚身本來已經好肥美. 放入口魚肉嫩滑, 一絲絲慢慢瓦解, 口中唔會有多餘的殘渣. 魚鮮味同肥油香再加上煙熏的木醬香味, 令我好少食魚的人都好難抗拒, 真係好!
蟹粉拌麵
據我了解, 呢間店的大廚係天香樓大廚的兒子. 講到天香樓, 一定都係蟹粉拌麵, 裡面的蟹粉有如黃金一樣的色相, 亦如黃金一樣的價錢. 而我又見到呢間店餐牌上有蟹粉拌麵, 所以必定要試試. 價錢方面, 單看這碗如酒樓白粥大的麵已經要收$250.
將佢分成兩碗, 再加少少香醋. 蟹粉的香味加入醋形成複雜的味道. 由於蟹粉重身配上香醋中和, 令其味道流到口中每個角度, 而麵條軟硬適中, 令牙齒感覺有活力.吞罷, 蟹粉香氣停在口中縈繞不散, 絕佳!

雖然是舊相一則, 但友人至今仍對這個蟹粉拌麵難忘不已!

沒有留言:

張貼留言